Hvalir! Ótrúlegar skepnur, svo forvitnilegar og í senn svo dularfullar. Hvalir eru með fjölbreyttustu spendýraættbálkunum og eru þeir þekktir fyrir að brjóta hin ýmsu met. Steypireyðurin er stærsta skepnan sem lifað hefur á jörðinni, steypireyður og langreyður eru háværustu lífverurnar á jörðinni, sá sem framkallar flóknustu og lengstu söngvanna í dýraríkinu er hnúfubakurinn og búrhvalurinn er fær um að kafa dýpra en nokkuð annað spendýr.

Það er svo lítið sem við vitum um þessi spendýr þrátt fyrir óendanlegar rannsóknir á þeim síðustu áratugina. Hvalir hafa virkilega fjörgað ímyndunarafl sögumanna í gegnum tíðina. Á fyrri öldum voru til ýmsar sögur á Íslandi af ógurlegum hvölum með rauð höfuð sem flökkuðu um höfin í gríðarstórum hópum og tortímdu öllum þeim skipum og mönnum sem urðu á vegi þeirra. Með tímanum hefur maðurinn komist að allt öðrum staðreyndum um hvalina og fundið út þeir eru ótrúlega friðsamar skepnur og oft á tíðum mjög forvitnar og gæfar.

Enn eru vísindamenn að finna nýjar tegundir hvala, sem dæmi var staðfest ný tegund stórhvelis í suðurhöfum síðsumars árið 2003, um er að ræða reyðarhval sem ekki er ólík langreyði og sandreyði. Í dag eru þekktar 84 hvalategundir en innan þess teljast stórhveli, höfrungar og hnísur. Af þessum tegundum eru 14 skíðishvalategundir og 70 tannhvalategundir.

Í dag vinna rannsóknarmenn hörðum höndum við hvalarannsóknir og áhrif athafna mannsins á lífsskilyrði þeirra. Tækninni fleytir fram og við erum sífellt að læra meira um þessi dulafullu spendýr hafdjúpanna.